OM KRL X (10 poeng ekstra)

KRL-seksjonen kan i  tilby studentar i AU og DALU (SALU) ein ekstra eksamen i KRL på 10 poeng. Vi kallar studiet for KRL X Kurset er gratis (berre krav om betalt semesteravgift).

Med KRL X frå du til saman 30 poeng KRL, noko som er jamgodt med KRL 1 i den førre modellen for allmennlærarutdanninga. Med 30 poeng kan du byggje vidare til 60 og 90 poeng KRL, ev. vidare på ein mastergrad. Ved lærarutdanninga i Bodø arbeider ein òg med å få lagt desse 90 studiepoenga inn ein master i tilpassa opplæring med vekt på KRL.

Du bestemmer sjølv emne og problemstilling for fordjupingsoppgåva, og du finn sjølv fram pensumlitteraturen (700 sider). Denne pensumlitteraturen skal vere litteratur som det er naturleg å knyte til det emnet du skriv om i fordjupingsoppgåva.

FORMALIA

Innlevering til ekspedisjonskontoret i 3 eksemplar (ikkje gløym din eigen kopi i tillegg). Søknad om utsetjing skal leverast til eksamensansvarleg (ikkje faglærar).

Hugs namn på framsida, tittel, semester og årstal, og ikkej gløym pagineringa (sidetal). Bruk Høgskolens forside for innleveringar.

GODE TIPS

TIPS til gjennomføringa: Oppgåva skal ikkje vere eit essay eller ein norskstil med sterke meiningar på svakt grunnlag ("synsing"), men ei vitskapleg oppgåve med god dokumentasjon og med ryddig og velgrunna drøfting og argumentasjon.

Velje først emne eller temaområde. Les pensumlitteraturen om dette emnet godt!

Oppgåva skal ikkje vere ei avskrift av pensum, du kan skrive om eller problematisere visse sider ved faget eller ved undervisninga av faget.

Tenk problemorientert (PBL). Har du ein god idé, er mykje gjort. Formuler eit problem eller ei spesiell oppgåve innanfor emnet ditt. "Kva er islam" er for så vidt ei problemstilling, men er det ei god problemstilling? Nei, eit spørsmål er ikkje nødvendigvis ei god problemstilling.

Det er ofte innanfor didaktikken at det er mogleg å skrive noko ingen har skrive om før, men prøv å tenkje originalt òg  i fagdelen! 

Tenk empirisk (samle materiale) og tenk lokalt! Samle masse stoff (det som ofte tek lengst tid).

DOKUMENTASJON

Faktainnsamling frå skriftlege og munnlege kjelder skal ikkje berre vere noko du brukar for å bli orientert om eit emne, men også vere dokumentasjon når du skriv og for dine påstandar. 

Ikkje ver einspora i valet av informasjon/dokumentasjon. Søk fleire typar informasjon og gjerne ulike meiningar om dette.

Faktastoffet må vere truverdig og kunne etterprøvast (kan bli sjekka av sensorane). OBS ikkje avskrift eller referering av argument utan å gje opp kjelde! Gje opp kjelde(r) til sitat, påstandar o.l. helst i fotnotar. direkte kopiering frå Internett fører automatisk til stryk. 

Det er ikkje lov å skrive direkte av eller lime inn tekst frå Internett eller andre kjelder utan å gje opp kvar du har teke det i frå, og slike sitat skal alltid stå i hermeteikn. Avskrift fører automatisk til stryk, og å "låne" ei oppgåve du finn på nettet er sjølvsagt jamgodt med juks. 

Lag litteraturliste og innhaldsliste, ev. forkortingsliste. Internettsider med full URL og dato du las sida eller dato sida sist vart oppdatert.

OPPBYGGING OG PROSESS

Oppgåva skal normalt ha ein fagleg og ein didaktisk del.

Ein didaktisk del er ikkje alltid eit krav, og det skal ikkje vere eit undervisningsopplegg i detalj og ikkje meir enn ein 1/4 av oppgåva.

Ein vanleg struktur på fagdelen er:

1) innleiingsdel med problemstilling og metode, presentasjon av materialet,

2) gjennomføringsdel, drøftingsdel,

3) oppsummeringsdel med konklusjonar (jf. innleiingsdelen med problemet du vil drøfte eller finne ut av).

Drøft for og mot ("pro et contra")! Kva talar for ein påstand, kva talar mot? Korleis veg du argumenta mot kvarandre til slutt? Skriveprosessen: ei sirkelrørsle mellom heilskap og del. Den endelege formuleringa av innleiinga er noko ein kan vente med til slutt, det må vere 100 prosent samsvar mellom det du seier du skal gjere og det du gjer.

RETTSKRIVINGA

Ekstra kontroll av skriveleif heilt til slutt? Få nokre andre til å lese gjennom? Bruk den automatiske ordrettaren på datamaskina (OBS problem av typen "eleven" som blir til "elven").

EVALUERING

Evaluering skjer ved karaktersetjing (bokstavkarakter A-F). 

Vi gir ein samla karakter etter ei totalvurdering.

Dei som ønskjer andre kommentarar kan berre ta kontakt med faglærar etter sensuren.

Liste over nokre tidlegare emne for KRL-fordjupingsoppgåver